« Ce jourd’huy vingt quatre du mois d’octobre, a esté baptizé par moy prestre soubsigné, Marie, né en legitime mariage le vingt du mesme mois, fille de Olivier O’Gara, colonel, et de Marie Flemmin, ses pere et mere, le parain François Ploeden, sous gouverneur de monseigneur le prince de Galles, la marainne Brigitte Barnovelle, fille de monsieur le comte Barnoel et de Margueritte Dongan, ses pere et mere, qui ont signé.
Fra. Plowden
Bri. Barnewall
F. Gaultier »

« Ce jourd’huy 28e octobre 1696, a esté baptisé dans la chapelle du chateau viel de Saint Germain en Laye par monsieur Innes, aumosnier du roy d’Angleterre, Jacques François, comte de Tynmouth, né le 29e du present mois, fils de haut et puissant seigneur monseigneur le duc de Berwick et de dame dame Honoré Bourck, son epouze, le parain tres haut et tres puissant prince Jacques second, roy d’Angleterre, la maraine tres haute et tres puissante princesse Marie d’Est, princesse de Modenne et reine d’Angleterre, lesquels ont signé en presence et du consentement de maistre Estienne Coppin, l’un des vicaires de cette paroisse, qui a apporté les saintes huilles revestu de son surplis et de son estolle, en presence du pere.
Jacobus R.
Maria R.
Berwick
Iness
Coppin, vicaire »

« Ce jourd’huy deuxiesme novembre, a esté baptizée par moy prestre, docteur de Sorbonne, abbé de Nostre Dame de Sully, prieur et curé de ce lieu, Elizabeth Honorée, née en legitime mariage le trente et un du mois passé, fille d’honorable homme Charles Macarty, chef de Gobelet du roy d’Angleterre, et de damoiselle Heleine Sainmessont, ses pere et mere, le parein haut et puissant seigneur Jacques, duc de Berwick, la mareinne madame Elizabeth Walgraffe, femme de monsieur le chevallier Walgraffe, tous anglois de nation et demeurans en cette paroisse, qui ont signé avec le pere present.
Charles Macarti, Berwick
L. Converset, Isabella Waldegrave »

« Du mesme jour, a esté baptisé par monsieur l’abbé Enis, aumosnier de Sa Majesté britannique, Jacques, né en legitime mariage le jour precedent, fils de Richard Biddulph, gentilhomme de la chambre, officier de la chambre du roy d’Angleterre, et de Marie Artubar, ses pere et mere, le parein tres hault et tres excellent prince Jacques second, roy de la Grande Bretagne, la mareinne haulte et puissante dame madame la duchesse de Bervik, qui ont signé, en presence de maistre Etienne Coppin, prestre et vicaire de cette paroisse royalle de Saint Germain en Laye, qui a apporté les saintes huiles, revetu de son surplis et etolle, le pere a aussy signé.
Jacques R.
Inese
Rich. Biddulph, H. Berwick
Coppin, vicaire »