« Du mesme jour, a esté baptizé par monsieur l’abbé Ronchi, aumosnier de Leurs Majestez brittanniques, dans la chappelle du chasteau vieil de ce lieu, Jacques François Edouard, né en legitime legitime mariage le jour precedent, fils de François de Gasis de Beaulieu, premier chirurgien de Leursdittes Majestez, et de damoiselle Felicité Jullienne, ses pere et mere, de cette paroisse, le parrein tres serenissime prince monseigneur le prince de Galles, fils aisné de tres haut et puissant monarque Jacques second, roy de la Grande Bretagne, et de tres haute et vertueuse princesse Marie d’Est de Modene, son epouze, la mareine madame la comtesse de Perthe, dame d’honneur de la reine d’Angleterre, lesquels ont signé avec le pere present, en presence et du consentement de messire Jean François de Benoist, docteur de la maison de Sorbonne, prieur et curé de ce lieu, lequel a aussy signé et a apporté les saintes huisles revetu d’etolle et surplis.
Jacques P.
Le contess de Perth
Beaulieut, P. Ronchi
De Benoist »

« Ce jourd’huy quatriesme aoust mil six cent quatre vingt dix neuf, a esté fait et solemnisé en face de nostre mere sainte Eglise par moy prestre soubsigné le mariage de David Lewis, valet de pied de la reyne d’Angleterre, fils de defuncts Jean Lewis et d’Elisabeth Grossithes, ses pere et mere, d’une part, et de Marie Baker, fille d’Antoine Baker et de defuncte Sara Thomas, d’austre part, tous deux anglois de nation et de cette paroisse, apres en avoir publicé les bans au prosne de la messe paroessialle par trois dimanches ou festes consecutifves, scavoir les vingt cinq, vingt six juillet et deuxiesme aoust de la presente annez, les fiancailles faittes le jour precedent, le tout sans opposition, en presence de Henry Paris, maistre d’hostel ordinaire du roy d’Angleterre, et du sieur Jean Hatfield, tapessier du roy d’Angleterre, et de maistre Hugues Augustin Baussonnet, qui ont signé, l’epouse et l’epoux ont declaré ne scavoir signer.
J. Hatfield, John Bevan, H. Parry
Baussonnet, François Ffox.
Marie Mogan
Ann Beaan »

« Le vingt et uniesme jour dud. mois, Loys de Bethune, filz de hault et puissant seigneur messire Philippes de Bethune, chevalier, baron des villes de Selles et Charte, seigneur chastellain de Chabry, Fontmareau et Millandre, conseiller du Roy en ses conseils d’Estat et privé, capitaine lieutenant de deux cens hommes d’armes des ordonnances de Sa Majesté soubs la charge de monseigneur, frere du Roy, et gouverneur dud. seigneur, baillif de Mante et Meullant, et de feue dame Catherine Le Boutillier, ses pere et mere, qui nasquiet le [vide] jour de febvrier mil six cens cinq, receu les sainctes ceremonies du sacrement de baptesme à Sainct Germain en Laye, en la chappelle du vieil chasteau dud. lieu, ayant esté baptizé auparavant à Paris lors de sa naissance, et furent ses parrain et marrainne tres hault et tres puissant prince Monseigneur, frere, et Madame, sœur du Roy à present regnant Loys treiziesme, qui l’ont ensemblement nommé Loys au nom de Sad. Majesté. »

« Du mesme jour, a esté inhumé au cymetiere Benjamin Cotton, porteur de chaise de la reine d’Angleterre, aagé de vingt neuf ans, decedé le jour precedent, messe haute, prieres et suffrages accoutumez chantez pour le repos de son ame en presence de maistres Nicolas Desprez, prestre, et Pierre Parmantier, qui ont signé.
Desprez
P. Parmantier »

« Du mesme jour, a esté baptizée par moy prestre vicaire soussigné Henriette Marguerite, née en legitime mariage le jour precedent, fille de Robert Briquet, marchand de vin, et de Marguerite Croissy, ses pere et mere, le parrein Jean Jacques Asmard, chirurgien de la maison du roy d’Angleterre, la mareinne damoiselle Henriette Antoine, femme de François Descoubes, officier de feu la Reine, tous de cette paroisse, qui ont signé.
H. Anthoine, Azemart
Trinité »

« Du mesme jour, a esté baptizé dans la chappelle du chasteau vieil de ce lieu par monsieur l’abbé ROnchy, aumosnier du roy et de la reine d’Angleterre, Charles, né en legitime mariage le quatriesme du present mois, fils d’Olivier O’Gara, colonel irlandois, et de Marie Flamming, ses pere et mere, le parrein tres haut et tres puissant prince Jacques second, roy d’Anglterre, lequel a signé en presence et du consentement de maistre Michel Trinité, prestre, vicaire de cette paroisse, lequel a apporté les saintes huilles revestu d’etolle et surplis.
Jacques R.
P. Ronchi, J. Bulkeley
Trinité »

« Du mesme jour, a esté inhumé au cymetiere Charles Lonning, aagé de dix neuf ans, fils de Guillaume Lonning, valet de chambre de Son Altesse royalle monseigneur le prince de Galles, et de Dulsabella Atton, ses pere et mere, anglois natif de Londres, decedé le jour precedent en cette paroisse, vespres des morts, prieres et suffrages accoutumez chantez pour le repos de son ame en presence de maistres Nicolas Desprez, prestre, et Pierre Parmantier, qui ont signé.
P. Parmantier »

« Ce jourd’huy dix huitiesme juin, a esté baptizé dans la chapelle du chateau vieil de ce lieu par monsieur l’abbé Ronchi, aumosnier de Leurs Majestez brittanniques, soussigné, Jacques Guillaume, né en legitime mariage le jour precedent, fils de Christophe Nugent, gentilhomme irlandois, et de Brigitte Barneval, ses pere et mere, le parrein tres haut et serenissime prince Jacques, prince de Galles, fils de tres haut et tres puissant prince Jacques second, roy d’Angleterre, et de tres excellente et vertueuse princesse Marie d’Est de Modenne, reine d’Angleterre, la mareinne madame la duchesse de Tirconnel, dame d’honneur de la reine d’Angleterre, lesquels ont signé avec le pere en presence et du consentement de messire Jean François de Benoist de Chazelles, prestre, docteur de la maison de Sorbonne, prieur et curé de ce lieu, soussigné, lequel a apposé les saintes huilles revetu d’etolle et surplis.
Jacques R.
C. Nugent, Tyrconnell
P. Ronchi
De Benoist »

« Ce jourd’huy seiziesme juin, a esté fait et solemnizé en face de nostre mere sainte Eglize par moy prestre soussigné commis à cet effet par monsieur le prieur le mariage de Denis O’Brien, valet de pied de monseigneur le prince de Galles, fils de deffunt Thimothée et de Margueritte O’Nelle, d’une part, et d’Heleine Telly, fille de Patrice Telly et d’Anne Caenne, d’autre part, tous deux irlandois, de cette paroisse, apres les trois publications de bans faittes aux prosnes des grandes messes paroissialles le huitiesme, neufviesme et quatorziesme du present mois, les fiançailles faittes le jour precedent, le tout sans aucune opposition et en presence Briain O’Briain, valet de pied de monseigneur le prince de Galles, Alexandre Stuart, aussy valet de pied de Saditte Altesse, de Jean O’Nelle, valet de chambre de millord Perth, et de Edmond Dufey, tous amis des parties, lesquels ont signé à l’exception de l’epoux et l’epouze, qui ont declaré ne scavoir signer.
Bryan O’Brine, A. S., John O’Neill
Edmund Ffay »

« Ce jourd’huy huitiesme juin, a esté baptizée par monsieur l’abbé Ronchi, aumosnier du roy et de la reine d’Angleterre, dans la chapelle du chasteau vieil de ce lieu, Marie, née en legitime mariage le jour precedent, fille de Georges Peirson, valet de chambre de la reine d’Angleterre, et d’Elizabeth Perkesson, ses pere et mere, la mareinne tres haute, tres vertueuse et religieuse princesse Marie de Modeine, reine d’Angleterre, epouze de tres haut et tres puissant prince Jacques second, roy d’Angleterre, laquelle a signé en presence et du consentement de messire Jean François de Benoist, prestre, docteur de la maison de Sorbonne, prieur et curé de ce lieu, lequel a apporté les saintes huisles revestu d’etolle et surplis, et a signé avec le pere present.
Maria R.
P. Ronchi
De Benoist »

« Du mesme jour, a esté baptizée dans la chapelle du château vieil de ce lieu par monsieur l’abbé Inesse, aumonier de Leurs Majestez britanniques, soussigné, Louise Marie, née en legitime mariage le jour precedent, fille de Miletius Magrath, capitaine irlandois dans le regiment d’Abbermale, et d’Anne Fitten, ses pere et mere, la mareine tres haute et serenissime princesse Louise Marie, princesse d’Angleterre, fille de tres haut, puissant et excellent prince Jacques second, roy d’Angleterre, et de tres haute et tres vertueuse princesse Marie d’Est de Modene, son epouze, le parrein par l’ordre de Leurs Majestez Alexandre Fitten, chancellier d’Irlande, lesquels ont signé en presence et du consentement de messire François de Benoist, docteur de la maison de Sorbonne, prieur et curé de ce lieu, qui a aussy signé.
Louise Marie P.
L. Inese, De Benoist, Fytton »

« Du mesme jour, a esté baptizée par moy prestre, docteur de Sorbonne, prieur et curé de Saint Germain en Laye, soussigné, Elizabeth, née en legitime mariage ce jour, fille de Thomas Jungoord, porte manteau du roy d’Angleterre, et de Catherine Senouk, ses pere et mere, le parrein Jean Houmston, cocher de la reine d’Angleterre, la mareine Marie Brennclet, fille d’Edouard et de madame Brimmelet, tous anglois de nation, demeurant en cette paroisse, qui ont signé, le pere, present, n’a pu signer.
John Humston, Mary Brinley »

« Du mesme jour, a esté baptizé dans la chappelle du chasteau vieil de ce lieu par monsieur l’abbé Inesse, aumosnier du roy et de la reine d’Angleterre, soussigné, Marie, née en legitime mariage le jour precedent, fille d’Eugene Callanam, capitaine dans les troupes de Sa Majesté britannique, et de Marie Chelton, son epouze, la mareine tres haute, tres puissante et vertueuse princesse Marie d’Est, princesse de Modene, epouze de tres haut et tres puissant prince Jacques Stuard, second du nom, roy d’Angleterre, d’Ecosse et d’Irlande, laquelle a signé en presence et du consentement de messire Jean François de Benoist, docteur de la maison de Sorbonne, prieur et curé de ce lieu, soussigné, lequel a apporté les saintes huisles revetu d’etolle et surplis.
Maria R.
Eug. Callanam
L. Ineses
De Benoist »

« Le neufiesme jour dud. mois, fut baptizé par reverend pere en Dieu messire Henry de Gondy, evesque de Paris, hault et puissant prince Henry, filz naturel et non legitime du Roy nostre sire, nommé par tres hault et tres puissant prince Loys de Bourbon, daulphin de France, et madame Elisabeth, sa sœur, ensemble a esté conferé aud. sieur Henry, avec la permission du curé de ce lieu, le sacrement de confirmation et tonsure clericalle.
Led. jour fut aussy baptizé Gabrielle, fille aussy naturelle et non legitime du roy de France, nommée par hault et puissant prince et princesse Cesar, duc de Vendosme, et Henriette, sa sœur.
Et à ce furent presens M. de Souverey, gouverneur de mond. seigneur le Daulphin, M. le duc de Monbazon, M. de Frontenac, M. le baron de Monglat, madame sa mere, madame Piollant, gouvernante des Enfans de France, et plusieurs aultres seigneurs et dames. »

« Ce jourd’huy vingt cinquiesme avril, a esté baptizé par moy prestre docteur de la maison de Sorbonne, prieur et curé de ce lieu de Saint Germain en Laye, soussigné, Joseph, aagé de vingt six ans, anglois de nation, fils de deffunt Jean Clarke et de Marie Mathu, de la religion des trembleurs, le parrein Guillaume Crene, gentilhomme, ecuyer de la reine d’Angleterre, la mareine dame Marie O’Brien, veuve de feu monsieur Skelton, controoleur de la maison du roy d’Angleterre, lesquels ont signé avec le baptizé.
Joseph Clarke
Guillaume Crane
Mary Skelton
De Benoist »

« Du mesme jour, a esté baptisé par moy prestre, docteur de la maison de Sorbonne, prieur et curé de ce lieu, Catherine Marie, née en legitime mariage le 17e du present mois, fille de Jean O’Madden, capitaine irlandois, et de Marie Bourk, le parrein Jacques Edouard François, conte de Lucan, la mareine haute et puissante dame madame Marie de Montecucully, comtesse d’Almont et dame d’honneur de la reine d’Angleterre, tous de cette paroisse, qui ont signé.
Lucan
Vittoria Montecucoli d’Avia d’Almond
De Benoist »

« Du mesme jour, a esté baptizé dans la chapelle du château vieil de ce lieu par monsieur l’abbé Inesse, aumosnier du roy et de la reine d’Angleterre, Marie, née en legitime mariage le dix septiesme du present mois, fille de Thomas Heywood, valet de chambre de la reine d’Angleterre, et de Sara Juxon, ses pere et mere, anglois de nation et de la religion pretendue reformée, lesquels ont consenty que leurditte fille seroit elevée et instruitte dans la religion catholique, apostolique et romaine, la mareine mareine tres haute et tres vertueuse princesse Marie d’Est, princesse de Modeine, epouze de tres haut et tres puissant prince Jacques second, roy d’Angleterre, d’Ecosse et d’Irlande, laquelle a signé en presence et du consentement de messire Jean François de Benoist, prestre, docteur de la maison de Sorbonne, prieur et curé de ce lieu de Saint Germain en Laye, qui a aussy signé avec le pere present.
Maria R.
Tho. Heywood
L. Ineses, De Benoist »

« Du mesme jour, a esté baptizé par moy prestre, docteur de la maison de Sorbonne, prieur et curé de ce lieu, Marie Charlotte, née en legitime mariage le jour precedent, fille de Anthoine Bertault, valet de chambre du roy d’Angleterre, et de Marie Doesy, ses pere et mere, le parrein Guillaume Chauvois, valet de garde robbe du roy d’Angleterre, la mareine Marie Charlotte Le Riche, fille de Denis Le Riche, deffunt, et de Claude Magdelaine Puthomme, tous de cette paroisse, qui ont signé avec le pere present et monsieur de Labadie, aussy valet de chambre du roy et son epouze, tesmoins, qui ont pareillement signé.
Antoine Beraut
J. Chauvois, MarieSeriche
De Labadie, Marye de Labadie
De Benoist »

« Ce jourd’huy dix septiesme avril, ont esté esté baptisez par moy prestre docteur de la maison de Sorbonne, prieur et curé de ce lieu, deux enfans masles, le premier desquels a eté nommé Pierre et l’autre Henry, tous deux nez en legitime mariage le jour precedent, fils de Jean Power, colonel irlandois, et de Catherine Eustache, leurs pere et mere, leur parein monseigneur Henry, duc d’Abbemare, la mareine madame la contesse de Perthe, tous demeurants en ce lieu, cour d’Angleterre, lesquels ont signé avec le pere present.
Le duc d’Albermarle
Mary Perth
John Power
De Benoist »

« Du mesme jour, a esté baptisé par moy prestre soubsigné Agnes, née en legitime mariage le vingt neuf du present mois, fille d’André Sime, valet de pied du roy d’Angletterre, et d’Elisabeth Poitvin, ses pere et mere, le parrain Alexandre Stuard, valet de pied du prince de Galles, la marainne Agnes Fay, femme d’Edmond Fay, capitaine irlandois, la maraine a signé, le parain a declaré ne scavoir signer et le pere present a signé.
Andrew Sime
A. S., Agnes Ffay
François Langhorne »

« Du mesme jour, a esté baptisé par moy prestre soubsigné Jeanne Susanne, née en legitime mariage le dix neufvieme du present mois, fille d’Edmond O’Nail et de Marie Loureke, ses pere et mere, le parrain le sieur Roger Strickland, page de la reyne d’Angleterre, la marainne Susanne O’Brien, epouse de Guillaume O’Brien, gentilhomme anglois, tous de cette paroisse, lesquels ont signé avec le pere present.
Roger Strickland, Susanna O’Bryan
François Langhorne »

« Aujourd’huy vingt septiesme mars, a esté baptizé dans la chapelle du chateau vieil de ce lieu par monsieur l’abbé Ronchy, aumosnier du roy et de la reine d’Angleterre, Charles, né en legitime mariage le mesme jour, fils de messire Charles O’Bryen, vicomte de Clare, et de dame Charlotte Bulkeley, ses pere et mere, le parrein serenissime prince Jacques Stuard, prince de Galles et fils de tres haut, tres puissant et religieux prince Jacques second, roy de la Grande Bretagne, et de tres haute, tres illustre et vertueuse princesse Marie d’Est de Modene, son epouze, la mareine madame Sophie Stuard, epouze de feu monsieur Henry Bulkeley, vivant grand maistre de la maison du roy d’Angleterre Charles second, lesquels ont signé en presence et du consentement de maistre François Gaultier, prestre, sou vicaire, qui a aussy signé et apporté les saintes huisles revestu d’etolle et surplis.
Jacques P.
Balkeley
P. Ronchi
F. Gaultier »

« Du mesme jour, a esté baptizé par moy prestre soussigné Alexandre, né en legitime mariage le 23e du present mois, fils de Georges de Saint Clair, officier du roy d’Angleterre, et d’Euphemie Magregas, ses pere et mere, ecossois de nation, le parrein Alexandre Moore, prestre en la paroisse de Saint Jean en Greve à Paris, la mareinne damoiselle Anne d’Ableville, fille de monsieur Ignace, marquis d’Ableville, ambassadeur extraordinaire du roy d’Angleterre en Hollande, demeurants en cette paroisse, lesquels ont signé avec le pere present.
Alexander Mors, Geo. Saint Clare
D’Albyville, Desprez »

« Du mesme jour, a esté inhumée au cymetiere Elizabeth Bolt, femme en secondes nopces de Rodolphe Morton, porte carreau de la reine d’Angleterre, aagée de quarante ans, decedée le jour precedent en la charité de ce lieu, messe haute, prieres et suffrages accoutumez chantez pour le repos de son ame en presence de maistre Nicolas Desprez, prestre, et Pierre Parmantier, diacre, sacristain, qui ont signé.
Desprez
P. Parmantier »

« Led. jour, fut baptizé ung enfant nommé Henry, filz de Anthoine Trolle et de Augustine Muet, nourrice de Madame, fille du Roy, le baptesme faict en la chappelle du chasteau à cause des malladies de verolle, led. enfant nommé par mad. dame, fille du Roy, et monsieur Alexandre, grand prieur de France, en la presence de madame de Monglat, gouvernante de monseigneur le Daulphin, et de madame sa sœur. »

« Ce jourd’huy vingt sixiesme fevrier, a esté baptizé par monsieur l’abbé Ronchi, aumosnier de Sa Majesté brittannique, dans la chapelle du chateau vieil de ce lieu Jacques Christophe, né en legitime mariage le vingt quattre du present mois, fils de Christophe Williams, officier du roy d’Angleterre et de Son Altesse monseigneur le prince de Galles, et de Marie Favane, ses pere et mere, irlandois de nation, de cette paroisse, le parrein serenissime prince monseigneur le prince de Galles, fils aisné de tres haut et puissant prince Jacques second, roy de la Grande Bretagne, et de tres haute et vertueuse princesse Marie d’Est, duchesse de Modene et reine d’Angleterre, son epouze, la mareine haute et puissante dame madame Sophie Stuard, epouze de monsieur Henry Bulkeley, deffunt, maistre de la maison du feu roy Charles second, roy d’Angleterre, lesquels ont signé en presence et du consentement de messire François de Benoist, prestre, docteur de la maison de Sorbonne, prieur et curé de ce lieu, lequel a aussy signé et apporté les saintes huiles revestu d’estole et surplis.
Jacques P.
P. Ronchi, J. Balkeley
Christophe Williams
De Benoist »

« Du mesme jour, a esté baptizé par moy prestre sou vicaire soussigné Anne, née en legitime mariage le jour precedent, fille de Robert Meslin, cocher de la reine d’Angleterre, et de Rebecca Houpre, ses pere et mere, anglois de nation, le parrain Joseph Coner, mareschal de Sa Majesté britannique, la mareine Anne Elizabeth Beslley, femme de Thomas Arnol, palfrenier de la reine d’Angleterre, tous demeurants en cette paroisse, qui ont signé avec le pere present.
Joseph Connor
Tho. Arnold
Robert Mastin
F. Gauthier »

« Du mesme jour, a esté baptizé par moy prestre soussigné André, né en legitime mariage le jour precedent, fils de Robert Flamen, vigneron, et d’Alexis Tiphoineau, ses pere et mere, le parrein André Fontaine, frotteur des appartements du roy d’Angleterre, la mareine Marie Claude Senechal, fille d’Anthoine Senechal, deffunt, et de Margueritte Flament, ses pere et mere, de cette paroisse, qui ont signé.
André Fontaine, Marie Claude Senechal
Puquet »

« Du mesme jour, a esté baptizée par moy prestre soussigné Marie, née en legitime mariage le dix neuf du present mois, fille de Jean Belle, officier dans les armées du roy d’Angleterre, et de Rose Bagley, ses pere et mere, ecossois de nation, demeurant en cette paroisse, le parrein Georges Midlton, apoticaire de Sa Majesté britannique, la mareine Anne Robisson representante la personne de madame la contesse de Mareschalle d’Ecosse, tous demeurans en cette paroisse, lesquels ont signé.
George Midlleton, Ann Roberson
Puquet »

« Du mesme jour, a esté baptizé par moy prestre sou vicaire soussigné Brigitte, née en legitime mariage ce mesme jour, fille de Marc Manin, postillon du roy d’Angleterre, et de Jeanne Rechaut, ses pere et mere, le parrein Jean Hanison, cocher de la reine d’Angleterre, la mareine Elizabeth Bellé, femme de Thomas Harnel, palfrenier de la reine d’Angleterre, tous anglois, de cette paroisse, qui ont signé.
John Humlton
Elizabeth Arnold
F. Gaultier »

« Ce jourd’huy vingtieme jour de janvier a esté fait et solemnizé en face de nostre mere sainte Eglize par moy prestre soussigné, authorizé de monsieur le prieur et curé de ce lieu, le mariage de François Ridge, sous palfrenier du roy d’Angleterre, fils de feu Richard Ridge et d’Elizabeth Monte, aussy deffunte, d’une part, et de Marthe Pedley, fille deEdouard et Luce Row, d’autre part, tous deux anglois, de cette paroisse, apres les trois publications des bans faictes aux prosnes des grandes messes paroissialles les premier, troisiesme et quatriesme du present mois, les fiancailles faictes le jour precedent, le tout sans aucune opposition et en presence d’Edouard Pedley, pere de l’epouse, de Guillaume Dubois, officier de monseigneur le duc de Berick, Thomas Butler, palfrenier de la reine d’Angleterre, amis de l’epoux, Edouard Hanley, aussy palfrenier de la reine, de François Feild, officier du roy, et de Catherine Relly, tous amis des parties, qui ont signé avec l’epouze, l’epoux a declaré ne scavoir signer.
Martha Pedley, Edward Podley, G. Dubois
Tho. Bulter, Catherine Reily
Francis Ffeild, François Langhorne »

« Ce jourd’huy dix neuf janvier, a esté baptisé par moy prestre vicaire soussigné Jean Abraham, né en legitime mariage le jour precedent, fils de Nicolas Michel, bourrelier du roy d’Angleterre, et de deffunte Charlotte Petit, decedée en travail, ses pere et mere, de cette paroisse, le parein Jean Abraham Baumester, musicien du roy d’Angleterre, la mareinne Anne Face, fille de deffunt Fiacre Face et de Marie Violette, ses pere et mere, de cette paroisse, lesquels ont signé.
Johannes Abrahamus Baumaister
Anne Face, Trinité »

« Ce jourd’huy vingt troizieme jour de decembre mil six cent quattre vingt dix huit, a esté baptisé par moy prestre vicaire Thomas, né en legitime mariage le jour precedent, fils de Jean Vilkay, valet de chambre de la princesse d’Angleterre, et de Margueritte Jouy, ses pere et mere, le parain Claude Saint Ouen, maçon, la marainne Antoinette Guillemat, veufve de François Latour, tous de cette paroisse, le parain a signé, la marainne a declaré ne scavoir signer.
Claude Saint Ouen, Trinité »

« Ce jourd’huy septiesme jour de decembre mil six cent quattre vingt dix huit, a esté baptizé en la chapelle du chasteau vieil de ce lieu par monsieur l’abbé Inesse, aumosnier du roy d’Angleterre soussigné, Louise Françoise, née en legitime mariage le cinquiesme du present mois, fille de Jean Stafford, controoleur de la maison de Sa Majesté britannique, et de Marie Susthcot, ses pere et mere, le parrein tres haut et puissant prince Jacques second, roy d’Angleterre, la mareinne tres haute et excellente princesse Louise Marie, princesse d’Angleterre, fille de Sadite Majesté britannique et de tres haute, excellente et vertueuse princesse Marie d’Est, duchesse de Modene et reine d’Angleterre, son epouze, lesquels ont signé en presence et du consentement de messire François de Benoist, prieur et curé de Saint Germain en Laye, qui a apporté les saintes huilles revetu d’etolle et surplis et a aussy signé.
Jacques R.
Louise Marie
L. Ineses, De Benoist »

« Du mesme jour, a esté baptizé par moy prestre habitué soussigné Edouard, né en legitime mariage le jour precedent, fils de Nicolas Clark, palfrenier du roy d’Angleterre, et de Marie Clark, le parrein Thadée Clark, ayeul du bapizé, valet de pied de la reine d’Angleterre, la mareine Anne Rodgelé, femme de feu Richard Crumpe, tous anglois, qui ont signé.
T. C., Ann Crumpe, Desprez »

« Le treiziesme jour dud. mois, furent mariez par M. le curé tres hault, tres illustre et tres puissant prince François de Bourbon, prince de Conty, et tres illustre princesse Loyse de Lorraine, fille de feu tres hault, tres illustre et tres puissant prince Henry de Lorainne, en son vivant duc de Guyse, en la presence et par le commandement du Roy, en la presence aussy de messeigneurs de Guise, de Gienville, monsieur de Villeroy. »

« Du mesme jour, a esté baptizé par moy prestre, vicaire soussigné, Baltazar, né en legitime mariage le vingt deux du present mois, fils de Gaspard Leconte, valet de pied de la reine d’Angleterre, et de Jeanne Flechy, ses pere et mere, le parrein Chles Leyborne, gentilhomme servant de la chambre de Son Altesse royalle monseigneur le prince de Galles, la mareine Elizabeth Ronchi, femme de monsieur le chevallier Waldegraive, medecin ordinaire de Sa Majesté britannique, lesquels ont signé avec le pere present.
Charles Leyburne
Gaspart Leconte, Isabella Waldegrave
Trinité »

« Du mesme jour, a esté baptizée par moy prestre, docteur de la maison de Sorbonne, prieur et curé de ce lieu, Elizabeth, née en legitime mariage le jour precedent, fille de Pierre Halpeny, cellier du roy d’Angleterre, et de Margueritte Wisly, ses pere et mere, irlandois, le parrein monsieur Pierre millord de Galmoy, millord de la chambre du roy, la mareine dame Elizabeth Waldegrave, epouze de monsieur le chevalier Waldegrave, medecin de Sa Majesté britannique et dame de la chambre de la reine, lesquels ont signé.
Galmoy, Isabella W., De Benoist »

« Du mesme jour, a esté baptizé par moy prestre sou vicaire soussigné Marie, née en legitime mariage le deuxieme du present mois, fille d’Edmond Tenson, valet de chambre de Son Altesse royalle monseigneur le prince de Galles, et d’Heleine Tobine, ses pere et mere, le parrein messire François Ploudine, sous gouverneur de Saditte Altesse monseigneur le prince de Galles, la mareine la mareine madame la contesse de Perte, lesquels ont signé avec le pere present.
Fra. Plondin, Edmund Johnson
Mary Perth
F. Gaultier »

« Ce jourd’huy douziesme octobre, a esté fait et solemnizé en face de nostre mere Sainte Eglize par moy prestre vicaire soussigné le mariage de Jacques Diharts, valet de chambre du roy d’Angleterre, veuf de Genevieve Douely, d’une part, et de Louise Gabrielle Cagnyeu, veuve de feu Thomas Delastre, procureur, d’autre part, tous deux de cette paroisse, apres en avoir publié un ban au prosne de la grande messe le 9e du present mois, et veu la dispense des deux années à eux accordée par monseigneur l’archevesque de Paris en dacte du dixiesme du present mois, les fiancailles faittes le jour precedent, le tout sans aucune opposition en presence des sieurs Laurent Dupuy, gentilhomme ordinaire de monseigneur le prince de Galles, de Jacques de Labaie, premier valet de chambre du roy d’Angleterre, de Jacques Randais, premier valet de garderobbe de laditte majesté, et d’Estienne Dumirail de Monnot, secretaire de monsieur Carel, tous amis des parties, qui ont signé.
J. Dihartz, Louise de Cagneu
L. Dupuy, J. Rodera
De Labadie, Monnot
Trinité »

« Ce jourd’huy quatorziesme jour de septembre, a esté baptizé en la chapelle du chasteau de ce lieu par monsieur l’abbé Ronky, aumosnier du roy d’Angleterre soussigné, Jacques, né en legitime mariage ce mesme jour, fils de Thadée Mahas, gentilhomme irlandois, et de Dorothée FilzWilliams, ses pere et mere, demeurans en cette paroisse, le parrein tres haut et tres puissant prince Jacques Stuard, second du nom, roy de la Grande Bretagne, Ecosse et Irlande, lequel a signé en presence et du consentement de messire Jean François de Benoist, prestre, docteur de la maison de Sorbonne, prieur et curé de ce lieu, soussigné, lequel a apporté les saintes huisles revestu d’estolle et surplis.
Jacques R.
P. Ronchi
De Benoist »

« Ce jourd’huy dix huitiesme aoust, a esté baptizée par moy prestre vicaire soussigné Elizabeth Anne, née en legitime mariage le jour precedent, fille de Jean Bevain, valet de pied de la reine d’Angleterre, et d’Anne Horton, ses pere et mere, le parrein Henry Pary, controoleur de la Bouche du roy d’Angleterre, la mareinne damoiselle Isabelle Lavery, fille de M. Arture Lavery, valet de chambre de la reine, de cette paroisse, qui ont signé avec le père present.
Isabella Lavery, H. Parry, Trinité
John Bevan »

« Du mesme jour, a esté inhumé dans cette eglize a esté inhumé dans cette eglize Richard Crumple, officier de la panneterie du roy d’Angleterre, aagé de trente cinq ans, decedé le quinziesme du present mois, vespres des mors, prieres et suffrages accoutumez, chantez pour le repos de son ame, en presence de maistres Pierre Parmantier, diacre, sacristain, hugues Augustin Baussonnet, qui ont signé.
P. Parmantier, Baussonnet »

« Ce jourd’huy dix septiesme aoust, ont esté supplées les ceremonies du baptesme par moy prestre docteur de la maison de Sorbonne, prieur et curé de ce lieu, à Marie, née en legitime mariage et ondoyée en l’extreme necessité par la sage femme le quinziesme du present mois, fille de Thomas Vallois, valet de chambre de millord Galmoy, et de Gresille Maggel, ses père et mere, le parrein Laurent Dupuy, valet de chambre de Son Altesse royalle monseigneur le prince de Galles, la mareinne haute et puissante dame madame la duchesse de Tirconnel, tous demeurants en ce lieu, qui ont signé.
La duchess de Tyrconnell
Laurent Dupuy
De Benoist »

« Du mesme jour, a esté baptizé par moy prestre vicaire soussigné Jean Pierre, né en legitime mariage ce mesme jour, fils posthume de feu Jean Veret, inhumé le cinquiesme du present mois, et de Jeanne Chastelain, le parrein Piperre Sainton, paumier de monseigneur le prince de Galles, la mareinne Bernardine Jouan, fille de Jean Jouan, officier de la reine d’Angleterre, et d’Agnes Maillan, ses pere et mere, de cette paroisse, qui ont signé.
Pierre Saincton
Bernardine Jouan, Trinité »

« Ce jourd’huy douziesme juin mil six cent quatre vingt dix huit, à onze heures d matin, par messire Jean François Benoist de Chazelle, docteur de la maison de Sorbonne, prieur et curé de Saint Germain, administrateur de l’hospital, avec la permission de monseigneur l’archevesque de Paris, a esté benie la premiere pierre de la nouvelle chappelle de l’hospital de ce lieu, fondée et devant estre elevée et bastie par les biensfaits de tres haut, tres puissant, tres excellent et tres victorieux prince Louis le Grand Dieudonné, tres chrestien roy de France et de Navarre, laditte pierre posée par tres haut et puissant prince monseigneur Louis Auguste de Bourbon, duc du Maine, gouverneur de la province de Languedoc, prince souverain de Dombes, comte d’Eu, pair de France, commandeur des ordres du Roy, lieutenant general des armées de Sa Majesté, colonel general des suisses et grisons, et en presence de messire Henry de Mornay, marquis de Monchevreuil, gouverneur des ville et chasteau de Saint Germain en Laye, capitaine des chasses, et qui ont signé le present acte avec monsieur l’abbé de Benoist, susdit prieur et curé de Saint Germain, maistres Michel Trinité, vicaire, François Gaultier, sou vicaire, Estienne Coppin, ancien vicaire et cappelain de la charité, Christophe Caslevan, prestre, Pierre François Pierre Teilhes et autres prestres du clergé de l’eglize royalle et paroissialle de ce lieu de Saint Germain en Laye, present à la ceremonie, qui ont pareillement signé en presence de Louis Guillon de Fonteny, conseiller du Roy, commissaire enquesteur examinateur pour Sa Majesté de Saint Germain en Laye.
Louis Augustin de Bourbon
Monchevreul, F. Gaultier
Guillon de Fonteny, Coppin
Carlevoy, prestre, Parlleps, Teilhes
Desprez, François Langhorne, Dromgole
Trinité, Baussonnet, Regnault
De Cohihoult
De Benoist de Chazelles »

« Le troisieme jour dud. mois, fut baptizé Alexandre, filz de Thomas Dumont, les parrains honorables hommes Alexandre de Franchine et François Bourdon, ingenieurs du Roy, la marrainne Anthoinette Legrand, femme de Charles de Hautecourt. »

« Les obseques de monsieur le duc d’Anjou
Voici une digression facheuse, dans les prosperitez de la Cour la plus florrisante et du plus grand monarque du monde. Mais il n’y a point de fortune si parfaite qui n’ait ses inegalitez, et l’on void dans toutes les histoires un melange continuel de ces diversitez heureuses et infortunees. Ainsi, quoy que la nostre soit remplie de merveilles et de choses surprenantes, sous le regne de Sa Majesté, elle se void obligée par cette ancienne vicissitude à y mesler les funerailles de ce jeune Lys que la France regardoit avec d’autant plus d’amour et de tendresse qu’elle croyoit voir par sa naissance ses autres pertes heureusement reparées. Voici donc ce qui s’est passé en cette lugubre ceremonie.
Le prince estant decedé, comme vous l’avez sceu, le 4 de ce mois, il fut exposé 24 heures dans son lit de trepas, environné de grand nombre de chandeliers d’argent, chargez de cierges blancs, aux armes du defunt, avec une petite credance vers les pieds, où estoit un crucifix et un autel au costé du mesme lit.
Les prestres de la parroisse de Saint Germain en Laye et les recollets de ce lieu là y psalmodierent incessamment et l’on y celebra des messes tout le matin du samedy et du dimanche.
Le 5, sur le soir, il fut ouvert en presence des premiers medecins et chirurgiens, et, le cœur ayant esté embaumé, fut mis dans un cœur d’argent, couvert d’un autre de vermeil doré, sur lequel estoit cette inscription : Ici est le cœur de Louis François de France, duc d’Anjou, fils de Louis XIV et de Marie Therese d’Autriche, decedé à Saint Germain en Laye le 4 novembre 1672, agé de 4 mois et 22 jours.
Le corps fut aussi embaumé et mis dans un cercueil de plomb par la marechale de La Mothe, gouvernante des Enfans de France, et par la dame de Venelle, sous gouvernante, et ce cercueil fut enfermé dans un autre de bois couvert de satin blanc croisé d’une moire d’argent, sur lequel estoit pareillement cette inscription : Ici git le corps de tres haut et tres puissant prince Louis François de France, fils de Louis XIV et de Marie Therese d’Autriche, decedé à Saint Germain en Laye le 4 novembre, agé de 4 moiset 22 jours.
Il fut, en cette maniere, posé sur le lit, avec le drap d’or de la Couronne, et la marechale de La Mothe posa le cœur sur le cerceuil, avec un carreau de velous blanc et une couronne de vermeil doré, sous un crespe aussi blanc.
Le 6, sur les 6 heures du soir, l’evesque de Langres, premier aumosnier de la Reyne, qui avoit esté prié par le cardinal de Bouillon, grand aumosnier de France, de faire la ceremonie de ces obseques, se plaça, en rochet et camail violet, à la teste du cercueil et, ayant fait les prieres et aspersions accoutumées, leva le corps en presence du prince de La Roche sur Yon, qui avoit esté nommé par le Roy pour faire les honneurs du convoy, de la marechale de La Mothe et du duc d’Aumont, aussi nommé par Sa Majesté pour accompagner le prince de La Roche sur Yon.
En mesme temps, ladite marechale de La Mothe prit le cœur et le mit entre les mains de l’evesque de Langres, et le corps fut porté par 4 gentilshommes ordinaires au carrosse destiné pour le conduire, quatre autres tenans les coins du poesle.
Il estoit immediatement suivi par ledit evesques de Langres, par le sieur de Brissac, lieutenant des gardes du corps, par le prince de La Roche sur Yon, par la marechale de La Mothe, par le duc d’Aumont et par les femmes de chambres du prince defunt, avec quelques officiers et gardes du corps.
En cet ordre, ayant esté descendu en la cour du vieux chasteau, il fut mis dans le carrosse du corps du Roy, où monterent ledit evesque de Landres, le prince de La Roche sur Yon, la marechale de La Mothe, le duc d’Aumont, la sous gouvernante, le curé de Saint Germain en Laye, et le marche se fit en la manière suivante jusques en l’eglise de l’abbaye de Saint Denys.
Les carrosses de suite du prince de La Roche sur Yon et du prince defunt, où estoyent les femmes de chambre et les officiers, faisoyent la teste du convoy, avec une brigade de chevaux legers.
Un des carrosses du Roy, où estoyent les huit gentilshommes ordinaires, suivoit et precedoit immedatement celuy du corps du Roy où estoit le cercueil, environné des valets de pied de la grande et petite escurie, avec les pages aussi de l’une et de l’autre escurie, à cheval, aux costez du carrosse.
Le sieur de Brissac, lieutenant des gardes du corps, estoit derriere, à la teste desdits gardes, et la marche estoit fermée par une brigade des gens d’armes, tous portans des flambeaux de cire blanche ainsi que les chevaux legers, pages et valets de pied.
On alla ainsi, par Chatou et le pont de Neuilly, à Saint Denys, dont la premiere porte et celle de l’eglise estoyent tendues de blanc, avec des ecussons aux armes du prince defunt.
Le convoy estant arrivé, sur les onze heures, à la porte de ladite eglise, le corps fut tiré du carrosse par les mesmes gentilshommes ordinaires et receu par les religieux, tous un cierge blanc à la main, l’evesque de Langres l’ayant presenté par un beau discours au prieur, lequel y repondit.
Ensuite, les 4 gentilshommes porterent le corps au chœur de l’eglise, les coins du poesle tousjours soustenus par les 4 autres, et suivi du prince de La Roche sur Yon et des autres personnes cy devant nommées. On le posa sur une estrade, sous un lit à pentes de damas blanc, avec les crespines d’argent aux armes du prince defunt, en broderie d’or et d’argent, le tout eclairé, ainsi que le grand autel, d’un nombre infini de cierges sur des chandeliers d’argent, avec de pareils ecussons.
L’evesque de Langres, en ses habits pontificaux, se plaça dans un fauteuil, aux pieds du cercueil, le prince de La Roche sur Yon à la teste, la marechale de La Mothe à costé droit de ce prince, et le duc d’Aumont à sa gauche, sur des carreaux de velous blanc.
Les seances prises, ce prelat fit les prieres, encesnsemens et aspersions ordinaires, apres quoy les gentilshommes porterent le corps au caveau, où il fut inhumé par ledit prelat.
La ceremonie achevée, chacun retourna à son poste pour accompagner le cœur, que l’on porta, dans le mesme ordre, au Val de Grace.
Il fut receu à la porte du convent par toutes les religieuses, un cierge à la main, l’evesque de Langres l’ayant, aussi, presenté à la superieure et, en mesme temps, on le porta au chœur de ces religieuses suivi de toutes les personnes du convoy.
Ce prelat l’y posa sur une credance entourée de quantité de chandeliers d’argent garnis de cierges et fit les prieres, encensemens et aspersions. Apres quoy, ce cœur fut porté au lieu où reposent ceux de la reyne mere et des enfans de France, toutes les choses ayans esté ordonnées et conduites par les soins du sieur de Saintot, maistre des ceremonies.
[…]
A Paris, du bureau d’adresse, aux galleries du Louvre, devant la rue Saint Thomas.
Le 18 novembre 1672.
Avec privilege »

« Du mesme jour, a esté baptizée par moy prestre soussigné Marie, née en legitime mariage le jour precedent, fille de Matthieu Crean, cuisinier du roy d’Angleterre, et de Jullienne Canty, irlandois de nation, demeurants en cette paroisse, le parrain Jacques Skelton, fils de feu Beville Skelton, controoleur general de la maison du roy d’Angleterre, et de Marie O’Brien, ses pere et mere, la marainne Marie Stafford, fille de Jean Stafford, controoleur de la maison du roy d’Angleterre, et de Marie Southcot, tous de cette paroisse, qui a signé, le parrein a declaré ne scavoir signer.
Mary Stafford, Desprez »

« Ce jourd’huy vingtieme may, a esté baptizé par moy prestre vicaire soussigné Robert, né en legitime mariage ce mesme jour, fils de Thomas Boutler, palfrenier de la reine d’Angleterre, et d’Innoncenx Millord, ses pere et mere, le parrein Robert Boukinham, ecuyer de Son Altesse royalle monseigneur le prince de Galles, la mareinne Elizabeth Boukinham, fille dudit sieur Boukinham parrein et d’Elizabeth Patisson, ses pere et mere, tous de cette paroisse, qui ont signé.
Robert Buckenham
Elizabeth Buckenham, Trinité »